SURAU: Educational Engineering

Manapak Jajak, Menemukan Potensi Diri Sedini Mungkin

Carito Lapau

Lapau

Lapau tidak dapat dipisahkan dari institusi sosial dalam konsep budaya Minang, Di lapau, sambil sarapan pagi, terjadilah berbagai dialog, pembahasan, mulai dari persoalan sehari-hari yang berkaitan dengan kehidupan, ilmu pertanian, ekonomi, sampai politik dan hukum. Sesempit apapun waktu yang tersedia, orang-orang yang ada di lapau pasti sempat membahas sesuatu. Dan yang lebih penting, lapau bukan untuk menggosip, tetapi tempat saling berbagai pengalaman, adu argumen, dan semua yang ada di situ berperan sebagai “narasumber”, dan biasanya pembahasan akan menggunakan berbagai sudut pandang, seperti agama, realita kehidupan dan filosofis. Bagi orang Minang, berfikir filosofis adalah milik setiap individu karena setiap sudah biasa berbicara tentang hakikat sesuatu atau yang sering disebut “hakikaik“. Hakikainyo, tu apo? pertanyaan seperti ini sudah menjadi sesuatu yang lumrah bagi setiap orang. Berfikir dialogis, dialektis, egaliter, divergen adalah-adalah istilah-istilah asing tetapi tidak asing bagi orang Minang ketika kita simak pembicaraan mereka di lapau itu.

Dalam cerita ini, sengaja diberi judul “Carito di Lapau Budin”. Dulu, sekitar tahun 70-an di Nagari Situjuah Batua, Kabupaten 50 Kota, di pojok pasar (balai) dan tidak jauh dari Mesjid Pahlawan, ada sebuah Lapau yang terkenal dengan “Lamang dan Pisang Goreng“, yang punya lapau itu sepasang suami istri yang bernama Budin dan Jiah. Setiap pagi, sehabis shalat Subuh, Lapau ini ramai oleh pengunjung untuk sarapan pagi sebelum berangkat ke ladang, ke sawah atau ke pasar bagi pedagang. Dan untuk mengenang hal itu, di rubrik ini akan di bahas beberapa persoalan yang terjadi sesuai dengan gaya lapau. Selamat menikmati.

Panunggu Lapau

Zulfikri Anas

1. TaimpikHandak Di Ateh…

“Lah saminggu ko hujan taruih, lado ambo baru salasai batanam, mudah-mudahan indak busuak anaknyo” kato si Muncak mamulai ciloteh di pagi nan agak dingin ko dari nan biaso. Iyo pulo, “banda-banda banyak nan runtuah”, kecek Sutan Geleang manyalo. “Tapi basyukur juo lah awak saketek”, kecek Budin sambia mangocok teh talua. “Tantu lah iyo, angku Budin badarai galakno, lapauno makin rami, samantaro kito-kito ko indak jadi ka sawah, hati batambah rusuah juo. Sapanjang hari tapaso bakuruang badan, kok indak di lapau di rumah. Lamo-lamo tambah sansai hiduik kito jadino, bosan awak takuruang taruaih” kecek Malin sambia manggarutu dengan dilaek khas Bukittingginyo

“Jadi malin bosan takuruang di rumah?, aneh awak ko ndak, katiko takuruang ingin di lua, kok taimpik ndak diateh, nan ka lamak surang sae, cadiak buruak”, salo Muncak mambuek taburai galak urang salapau tu.

“Ee…en ambek cah”, kato Malin, agak tasingguang. “Itu bukan cadiak buruak namono. Itu ajaran nan sabana manusiawi. Jangankan manusia, samuik sajo kok tapijak (taimpik) ano mamburangsang, digigikno kaki awak, buruang dikuruang maronta ingin tabang. Itu binatang tu, apolai manusia. Sabananyo, itu peringatan bagi kito katiko bahubuangan jo urang lain. Baiak caro bakawan, ba-anak buah, maupun batetangga. Jan mantang-mantang awak bakuaso, maraso labiah pado urang lain, satiok tindakan manyakik bagi urang. Kok jadi pamimpin, urang ditakan abih, kok dapek pikiran urang-urang “dikuruangno”. Namono manusia, kok dikuruang ingin kalua, kok diimpik ingin malawan. Samkin kuek diimpik samakin kuek pulo dorongan untuak malawan. Kecek urang nan basikola, itu samao jo ilimu hukum Newton, aksi samo jo min-rekasi (aksi = – rekasi), atau Hukum Archimedes, satiok benda dan campuangkan ka dalam aie, benda tu akan mandapek dorongan ka ateh sabanyak aie dan dipisahkan. Jadi, lai jaleh dek konco-konco sadono, indak ciek juo papatah Minang nan batujuan untuak mamburuakan diri sandiri. Jadi, taimpik ndak di ateh, takuruang ndak dilua, itu mangigek-an kito supayo kito saling mehormati urang lain. Jan maniayo. Itu mukasuikno. “Nan heranno awak, sabanyak tu pemikir urang Minang, kok ma-aminkan kasadono. Sapakaik menecek-an urang minang “munapiak, idan manirimo kenyataan. Lai rela sanak sodono, diimpik urang, tu awak mancigin sae manahan sakik. Indak malawan. Bantuak tu urang Minang? Ambo kiro bukan, palaweh lah caro bapikita tu saketek” kato Malin baturo-turo sambia manurunkan kaki dari palanta lapau, dan langsuang mailang di kelok ujuang dapua lapau Budin. “

Jadi pepatah tu menganduang ajaran yang sangat manusiawi, aratinyo humanis?” pertanyaan ko bakacamuak dalam pikiran urang-urang sa lapau tu. Iyo pulo ndak, di ma pulo rumusnyo ado pepatah Minang nan mancela diri-sendiri, kalau bukan untuk maagiah peringatan nan arif” (Zulfikri Anas).

2. Batanyo Kabau ka Padati…

“Ee…hhm, Assalamualaikum para mamak rumah!”. Apo kaba pagi ko, suaro Ajo Kuniang maurak lamunan urang-urang nan alah labiah dulu duduak di lapau Budin. “Eeeee…. Baa kaba Jo, lah lamo indak mancaliak nagari ko, bilo tibo?”. Tanyo Muncak sasudah manjawek salam dari Ajo Kuniang. “Tadi malam, jo pesawat paliang malam, dan tibo di siko sekitar pukua 12.00”., jawek Ajo.

“Baa carito di Jawa, Jo”, tanyo Budin. “E…Nan jadi makin jadi,nan tampiak, samakin tampiak, apo lai sajak BBM naiak”, kecek Ajo Kuniang sambia mamasan teh talua.

“Kini, basuo kato niniak moyang kito dulu. Sakali aie gadang, sakali tapian barubah. Manuruik carito urang tuo ambo dulu, di Pariaman itu banyak padagang nan mambao dagangan ka darek ko. Macam-macam nan inyo bao, tapi nan paliang banyak karambia. Wakatu itu alun ado oto, karambia jo barang dagangan lain dibao jo padati. Sahinggo hampia tiok hari kito maliek padati bairiang-iriang di sapanjang jalan mulai dari Lubuak Aluang arah ka Padang Panjang, dan taruih ka Bukik Tinggi. Wakatu itu, hasia karambia jo ikan asin balimpah, ladang subur, rumpuik untuak kabau indak mambali,, dan hiduik kito ko saliang tolong manolong, pokok-e sarek jo kakaluargaan”

Saking sareknyo jo raso kakaluargaan jo gotong royong, peristiwa padagang dari Pariaman ko manjadi inspirasi dek urang tuo-tuo kito dulu, sahinggo lahia lah perupamaan “batanyo kabau ka padati, jauah ko lai parantian”. Lah malasau-lasau bunyi angok kabau mandaki bukik Silaiang sabalun masuak kota padang Panjang, si kabau tu hanyo batanyo ka padati jauah ko lai tampek istirahat, sabab, paruik lah taraso lapa, dan sambia istirahat bisa makan rumpuik di tapi jalan. Gratis. Mungkin dek karano pangabdian kabau ko sabana tuluih, cubo bayangkan dek mamak-mamak rumah, di tangah malam buto, kabau tu bajalan taruih, kusianyo la ma-akuak-akuak dek kantuak, malah lah bamimpi pulo baraso manjadi pilot kapa tabang, nan kabau ko bajalan taruih, maikuik jalan. Kok ado nan baulah, nyo puta padati babaliak arah, kabau tu maikuik sajo, sahinggo babaliak pulang padati tu dibao kabau. Baitu carito urang dulu”. “Kok diibaraikan jo kadaan kini, “pilot otomatis”. Kalau lah stabil jalan kapa tabang tu,, pilot lalok, pasang pilot otomatis tadi. Mungkin urang nan mambuaek kapa tabang tu ta inspirasi dek kabau jo padati ko” yo Jo, salo Malin. Tabahak galak urang salapau tu mandanga salo Malin tadi.

“Tapi kini…… jaman lah barubah”…….Ajo Kuniang agak baranti sabanta sambia mahelo angok. “Barubah baa kecek Ajo?”, Malin Geleang indak saba mandanga kalanjuik-an carito Ajo Kuniang. “Aratinyo, katiko dulu awak baru datang ka Jawa, awak batua-batua ingin baraja, jadi apopun karajo nan ado, awak karajoan. Mambuek sipatu, lah dicubo, basorak di tapi jalan, lai pulo. Kok taraso panek, paliang-paliang beko awak minta istirahat sabanta. Tapi, kini, anak-anak mudo nan baru datang ka Jawa, mereka tu lain. Alun manga-manga karajo lai, upah lah ditanyo dulu, pado hal ilimu alun cukuik, bak kecek urang awak darah alun satampuak pinang, umua alun saumua jaguang”.

Dihubuangkan jo carito kito tantang parumpamaan kabau jo padati tadi, kini ungkapan itu lah barubah, sabalun kabau ka dipasangkan ka padati “batanyo kabau ka padati, bara komisi untuak den”. “Kalau dulu, lah panek dulu kabau tu, baru inyo batanyo jauah ko lai parantian, kini, alun dikarajokan lai, upah lah baminta dulu. Itu, nyo pangalaman ambo membina anak-anak mudo nan baru datang ka rantau. Mandanga carito Ajo Kuniang tu, tabusai galak urang salapau Budin tu. Tapi antah baa…….sakatiko galak tu baranti bantuak dikumandokan, dan urang di situ haniang, surang-surang baransua kalua dari lapau sambia malamun…….dan matohari lah mulai naiak. Saatnyo, ka sawah……(basambuang).

3. Mambangkik Batang Tarandam

“Hm..m! Assalamualaikum ww, mumpuang masih suasana rayo, salamaik Idulfitri, mohon maaf lahia jo bathin. Semoga kito mandapek-an kamanangan nan fitri. Amin!” Sapo Malin, agak talambek masuak lapau pagi ko. Iko hari partamo sasudah rayo lapau Budin dibuka sarupo nan biaso.

“Waalaikumsalam, samo-samo Lin” jawek urang sa-isi lapau sarantak.

“Ah.. baa kaba, agak talembek ma, masih banyak tamu ba rayo ka rumah”, salo Muncak. “Di ma pulo ka banyak tamu, keluarga nan dakek-dakek iyo, tapi itu sampai rayo hari ka-tigo. Awak bantuak ko, siapo nan ka datang, kecuali urang bapangkek, atau baharato, iyo banyak tamu-nyo. Kabatulan 2 hari ko ambo ado urusan saketek ka Padang, makonyo baru mancogok”, jawek Malin, agak manggarutu.

“Eeeee..ehh baa bantuak tarangah co itu Malin, kini maso lah lain Lin, sajak reformasi, wakil rakyat jo pemimpin dipiliah langsuang, apo lai rayo kiniko batapek-an jo suasana ka pemilu, kan banyak nan manfaatkan situasi. Jadi-nyo nan bapangkek jo nan bapitih nan mandatangi awak-awak ko” Ajo Kuniang marespon garutu Malin.

“Yo bantuak tu, mudah-mudahan jo caro bantuak tu tabangkik juo batang tarandam tu, lah sakian pulo tahun-nyo, urang awak indak muncul di pentas nasional, kok banyak nan mandukuang kan manang jagoan kito” kecek Muncak manimpali.

“Mbek chah! Nan sumbarang pakai parumpamoan nan alah dipikia masak-masak jo caro filsafat dek urang tuo kito dulu”. Malin protes mandanga ucapan Muncak.

“Baa ko Bantuak itu, kecek Malin”, tanyo Budin panasaran.

“Lai tau tuan-tuan sado-no, sasuatu nan jadi parumpamoan dipikia masak-masak dan dikaji aratino. Batang kayu tu singajo “dirandam” sabalun di pakai untuak ka tunggak rumah supayo ano kuek, tahan jo anai-anai, indak mudah patah, indak lapuak dek hujan. Jadi tarandam di siko aratinyo indak samo jo “tapuruak” doh. Dek urang banyak, kini parumpamoan itu dipakai sajajar jo “tapuruak”. Kalau diliek kadaan kini, indak ado urang awak nan muncul, itu bukan “tarandam” namo-no, tapi “tapuruak”, atau “tasirambau”, dek karano kamampuan mereka tu “standar-standar sajo” indak ado nan istimewa, baa kecek urang ka mampicayokan amanah. Istilah “tarandam” nan dipakai dalam parumpamoan “mambangkik batang tarandam”, aratinyo samo jo “baraja” manambah ilimu. Itu sajalan jo papatah “karatau madang di hulu, babuah babungo balun, marantau bujang dahulu, di rumah paguno balun”. Batang di randam untuak manambah kakuatan nan alah ado dalam batang tu. Bujang di suruah marantau, baitu pulo, untuak manambah ilimu nan alah ado pulo dalam diri no. Beko, tibo maso-no, alah tuntas-no baraja, ano kuek dek karano ilimu nan ado dalam diri-no tu, baru no muncul, dan kamunculan-no tu bukan dek karano nan basangkutan minta diangkek, tapi urang nan mambutuahkan”. Dan baliau diagiah amanah.

“Bara kahebatan Soekarno, namun dari sabanyak tu urang Indonesia, bailau picayo ka Hatta, dek karano Hatta lah satu-satu-no nan cocok dan mampu mahadok-i situasi wakatu itu. Baitu juo Buya kito HAMKA, baliau “muncul” bukan karano dukungan banyak, tapi jo ililmu. Kok ado saribu Kyai di negara kito ko nan samo kaliber-no jo baliau, namun bailau tidak dapek digantikan tampek-no. Tu baru namo-no batang tarandam. Ko indak, mantang-mantang bakuaso dek ba pangkaik tinggi jo harato banyak, dibali suaro urang, badakek-i urang supayo urang-urang tu namuah mandukuang, babuek janji banyak-banyak dan muluk-muluk. Ambo satuju bana kecek Angku Zairul Malin Bagindo dalam wawancara jo SM edisi nan lalu. Jiko bantuak tu caro-no, samo jo lomba panjek batang pinang. Di cari urang-urang nan namuah dan rela pundak-no diinjak, asal nan dijago-kan dapek naiak dengan mudah. Lah tibo di ateh, baliau manjadi rajo, bantuak kacang nan lupo jo kulik-no”, carito Malin agak panjang.

Urang nan ado di lapau jadi tadiam, sambia ma-inok-inok-an kato-kato Malin tadi.(za)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: